أخر الأخبار

تناقضات المجتمع الليبي بالليبي

تناقضات المجتمع الليبي بالليبي 

من بريد صحيفة المنظار


...ﺗﻤﺸﻲ ﻟﻠﺠﺎﻣﻊ ﺗﻠﻘﺎﻩ ‏( ﻓُﻞّ ‏)، ﺗﻌﻄﺲ ﻓﻲ ﻣﺠﻤﻊ ﻛﻠّﻬﺎ ‏( ﻳﺮﺣﻤﻚ ﺍﻟﻠﻪ ‏) ،ﺗﻮﻗﻒ ﻓﻲ ﺳﻴﻤﺎﻓﺮﻭ ﻣﺘﺴﻤﻌﺶ ﺇﻟّﺎ ﺍﻟﺴﺪﻳﺴﻲ ﻭﻣﺤﻤﺪ ﺍﻳﻮﺏ ﻭﻋﻠﻰ ﻋﺒﺪﺍﻟﻠﻪ ﺟﺎﺑﺮ ﻭﺍﻟﺪﻭﻛﺎﻟﻲ ﻭﺍﻷﺭﻛﺎﻧﻲ ﻭﻋﻤﺮ ﻋﺒﺪﺍﻟﻜﺎﻓﻲ ﻭﻣﺤﻤﺪ ﺭﺍﺗﺐ ﺍﻟﻨﺎﺑﻠﺴﻲ ﻭﺍﻟﺸﻌﺮﺍﻭﻱ ﻭﺻﺎﻟﺢ ﺍﻟﻔﻮﺯﺍﻥ ﻭﺍﻟﻠﺤﻴﺪﺍﻥ ﻭﻗﺎﺋﻤﺔ ﻻ ﺗﻨﺘﻬﻲ ﻣﻦ ﻣﺸﺎﺋﺦ ﺳﻌﻮﺩﻳﻴﻦ ﻭﻳﻤﻨﻴﻴﻦ ﻭﺣﺘﻰ ﻣﻦ ﺩﺍﺭﻓﻮﺭ ﻭﻛﺴﻼ ﻭﺧﺮﻃﻮﻡ ﺑﺤﺮﻱ ﻭﻣﺎ ﺟﺎﻭﺭﻫﺎ.

...ﺗﻤﺸﻲ ﻟﻌﺰﺍﺀ ﺗﻌﻴﺎ ﻣﻦ ﺍﻟﺴﻼﻡ، ﻭﻛﻠُﻬﺎ ﺗﺤﻜﻲ ﻉ ﺍﻟﻤﻴﺖ، ﻭﻛﺄﻧّﻪ ﺃﺑﻮ ﺫَﺭالغفاري ،ﻭﻭﻗﺖ ﺍﻵﺫﺍﻥ ﻣﺘﻘﺪﺭﺵ ﺗﺴﻤﻊ ﺍﻟﻠﻲ ﺣﺪﺍﻙ ﺷﻨﻲ ﻳﺤﻜﻲ ﻣﻦ ﻛﺜﺮﺓ ﺍﻟﺠﻮﺍﻣﻊ ﻭﺍﻟﻤﻴﻜﺮﻭﻓﻮﻧﺎﺕ ،ﻭﻭﻗﺖ ﺍﻟﺼﻼﺓ ﻣﺘﻔﻜﺮﺵ ﺗﻤﺸﻲ ﻣﻦ ﺷﺎﺭﻉ ﻗﺪﺍﻡ ﺟﺎﻣﻊ ﺍﻟﻠﻲ ﻓﻲ ﺳﻴﺎﺭﺓ ﻳﻨﻘﺰ ﻣﻨﻬﺎ ﻭﻉ ﺍﻟﺠﺎﻣﻊ ﺟﺮﻱ ،
ﻭﺍﻟﻠﻲ ﻳﻌﻄﻴﻚ ﻣﻮﻋﺪ ‏(ﺑﻌﺪ ﺍﻟﻌﺼﺮ‏) ‏(ﻗﺒﻞ ﺍﻟﻤﻐﺮﺏ‏) ‏(ﻗﻴﺲ ﺻﻼﺓ ﺍﻟﻌﺸﺎﺀ‏) ،ﻭﺍﻟﻠﻲ ﻳﻬﺪﺭﺯ: ‏( ﻭﺍﻟﻠﻪ ﻣﻦ ﺻﻼﺓ ﺍﻟﻔﺠﺮ ﻣﻌﺎﺵ ﻧﺮﻗﺪ‏) ‏( ﻧﺎﺧﺬ ﻓﻲ ﻏﻔﻮﺓ ﻗﺒﻞ ﺍﻟﻌﺼﺮ ‏) ‏( ﺃﻧﺎ ﻧﺼﻠﻲ ﺍﻟﻌﺸﺎﺀ ﻭﻧﺮﻗﺪ‏).!!!
...ﺗﻤﺸﻲ ﺑﺘﺰﻭﺭ ﻣﺮﻳﺾ ﻓﻲ الﻣﺴﺘﺸﻔﻰ ﺗﺒﻲ ﻧﺺ ﻧﻬﺎﺭ ﺑﺎﺵ ﺗﻮﺻﻞ ﻓﻴﻪ، ﻭﺍﻟﻤﺤﻄﺎﺕ ﻣﺘﺎﻉ ﺍﻟﻤﺴﺘﺸﻔﻰ ﺟﻤﺎﻡ ﺑﺪﻋﻮﻯ ﻋﻴﺎﺩﺓ ﺍﻟﻤﺮﻳﺾ ،
ﻭﻟﻮ ﺷﺎﻓﻮ ﻇﻠﻢ ﻛﻠّﻬﺎ ‏( ﺣﺴﺒﻰ ﺍﻟﻠﻪ ﻭﻧﻌﻢ ﺍﻟﻮﻛﻴﻞ‏) ‏(ﻭﺭﺑﻲ ﻳﺄﺧﺬ ﺍﻟﺤﻖ‏) ‏( ﻭﻳﻠﻘﺎﻩ ﻭﻳﺘﻠﻘﺎﻩ‏).
...ﻧﻐﻤﺎﺕ ﺍﻟﺘﻠﻔﻮﻧﺎﺕ ﺗﻜﺒﻴﺮ ﻭﺃﺩﻋﻴﺔ،ﻭﺻﻠﻮﺍﺕ،تتصل بواحد من نغمات الادعية قريب تجيك حالة وتعتكف،ﻭﻛﺎﻥ ﺩﺭﺕ ﺣﺎﺩﺕ ﻛﻠﻬﺎ ‏( ﻗﻀﺎﺀ ﻭﻗﺪﺭ‏)..ﻳﺨﺸﻮ ﺍﻟﺠﻮﺍﻣﻊ ﺑﺎﻟﻴﻤﻴﻦ، ﻭﻳﻄﻠﻌﻮ ﺑﺎﻟﻴﺴﺎﺭ، ﻭﻳﺘﺨﻄّﻮ ﻓﻲ ﺍﻟﺮﻗﺎﺏ ﺑﺎﺵ ﻳﻮﺻﻠﻮ ﻓﻲ ﺍﻟﺼﻒ ﺍﻷﻭﻝ!!
...كلهم شيوخ ويعرفوا الحق و الجمعة ما يصبقهم علها حد ﻭﻳﺪّﺍﻋﻜﻮ ﻉ ﺍﻟﻌﻤﺮﺓ ﻭﻳﺎ ﺳﻌﺪ ﻣﻦ ﻳﺴﻜﻦ ﻓﻲ ﺃﺑﺮﺍﺝ ﺍﻟﺼﻔﻮﺓ ﻭﺍﻟﻤﺮﻭﺓ ﺭﻳﺤﺎﻥ ﻭﺑﻮﻟﻤﺎﻥ ﺯﻣﺰﻡ ﻣﻜﺔ...ﻛﻠﻬﺎ ﻟﺤﻲ ﻭﺳﺎﻋﺎﺕ ﻓﻲ ﺍﻟﻴﻤﻴﻦ ﻭﺍﻟﺴﻮﺍﻙ ﻓﻲ ﺍﻟﺠﻴﺐ ﻭﺗﺸﻤﻴﺮ ﺍﻟﺴﺮﺍﻭﻳﻞ...!!!

ﺍﻣّﺎﻝ ﻣﻨﻮ؟؟ 

ﻣﻨﻮيهرب في ﺍﻟﻮﻗﻮﺩﻭﺍﻟﺬﻫﺐ، ﻭيبزنس في البطاقات، و الدولار،ﻭﺍﻟﻬﺠﺮﺓ ﻏﻴﺮ ﺍﻟﺸﺮﻋﻴﺔ ﻭﻃﻤﺎﻃﻢ ﺍﻟﺠﻤﻌﻴﺎﺕ ؟
ﻣﻨﻮ ﻳﺰﻭّﺭ ﻓﻲ ﻭﺭﻗﺔ ﺍﻟﻌﺎئلة ﻭﻛﺘﻴﺐ ﺍﻟﻌﺎئلة؟
ﻣﻨﻮ ﺍﻟﻠﻲ ﻳﺎﺧﺪ ﻓﻲ ﺭﺍﺗﺐ ﻣﺰﺩﻭﺝ ؟
ﻣﻨﻮ ﺍﻟﻠﻲ ﻳﺘﻌﺎﻣﻞ ﺑﺎﻟﺮﺑﺎ ﻭﻳﺒﻴﻊ ﺑﺎﻟﺸﻴﻜﺎﺕ ﺍﻟﻤﺼﺪﻗﺔ ﺑﺄﺳﻌﺎﺭ ﻣﻀﺎﻋﻔﺔ ؟
ﻣﻨﻮﺍﻟﻠﻲ ﻳﺴﺮﻕ ﻓﻲ ﻭﺯﻥ ﺍﻟﺨﺒﺰﺓ ﻭﻳﺒﻴﻊ ﻓﻴﻬﺎ ﺑﺤﻖ ﺑﻨﺪﻗﺔ ﻋﻠﻰ ﺍﻟﻌﺒﺪ ؟
ﻣﻨﻮ ﺍﻟﻠﻲ ﻳﻘﺘﻞ ﻭﻳﺴﺮﻕ،ﻭﻳﺨﻄﻒ ﻭﻳﺬﺑﺢ ﻭﻳﺸﺮِّﺩ ﻓﻲ ﺍﻟﻌﺒﺎﺩ ؟
ﻭﻓﻲ ﺁﺧﺮ ﺍﻟﻔﻴﻠﻢ ‏( ﻣﻨﺼﻮﺭﻳﻦ ﺇﻥ ﺷﺎﺀ ﺍﻟﻠﻪ ‏)
ﻣﻨﻮ ﺍﻟﻠﻲ ﻣﻴﺨﻠﺼﺶ ﻓﻲ ﺍﻟﻀﻲ ﻭﻻ ﺍﻟﻠﻤﻴّﺔ ؟
ﻣﻨﻮ ﺍﻟﻠﻲ ﻳﺪﺱ ﻓﻲ ﺍﻟﺤﻠﻴﺐ ﺑﺎﺵ ﻳﺒﻴﻌﻪ ﺑﺎﻟﻐﻼﺀ ﻭﺍﻟﻜﻮﺍﺀ ﻓﻲ ﺭﻣﻀﺎﻥ ؟
ﻣﻨﻮ ﺍﻟﻠﻲ ﻳﻐﺶ ﻓﻲ ﺍﻹﻣﺘﺤﺎﻧﺎﺕ ؟
ﻣﻨﻮ ﺍﻟﻠﻲ ﻳﻌﻴّﻦ ﺑﺎﻟﻮﺍﺳﻄﺔ ؟
ﻣﻨﻮ ﺍﻟﻠﻲ ﻳﻔﺴﺪ ﻓﻲ ﺃﺟﻬﺰﺓ ﺍﻟﻤﺴﺘﺸﻔﻴﺎﺕ ﺑﺎﺵ ﺍﻟﻨﺎﺱ ﺗﺼﺐ ﻋﻨﺪﻩ ؟
ﻣﻨﻮ ﺍﻟﻠﻲ ﻳﺼﻄﺎﺩ ﻓﻲ ﺍﻟﻤﺮﺿﻰ ﻭﻳﺤﻮّﻝ ﻓﻴﻬﻢ ﻉ ﺍﻟﻤﺼﺤﺔ ﺍﻟﻠﻲ ﻳﺨﺪﻡ ﻓﻴﻬﺎ ؟
ﻣﻨﻮ ﺍﻟﻠﻲ ﻻﻋﺐ ﻓﻲ ﻓﻠﻮﺱ ﺍﻟﻨﻔﻂ ﻭﺍﻟﻐﺎﺯ ﻭﺍﻹﺗﺼﺎﻻﺕ ؟
ﻣﻨﻮ ﺍﻟﻠﻲ ﻳﺪﻝّ ﻑ ﺍﻟﻨﺎﺱ ﻓﻲ ﺍﻟﻄﻮﺍﺑﻴﺮ ؟
ﻣﻨﻮ ﺍﻟﻠﻲ ﻳﻘﺺ ﻓﻲ ﺍﻟﻀﻲ ؟
ﻣﻨﻮ يلي يهبك في ستة معاشات 
ﻣﻨﻮ ﺍﻟﻠﻲ ﻣﺨﻠّﻲ ﺍﻟﻐﺎﺯ ﻭﺍﻟﺒﻨﺰﻳﻨﺔ ﻭﺍﻟﻔﻠﻮﺱ ﺑﺎﻟﻄﺎﺑﻮﺭ ؟
ﻣﻨﻮ ﺍﻟﻠﻲ ﺧﻠَّﻰ ﺍﻟﺤﻠﻴﺐ ﻳﻌﻄﻮﺍ ﻓﻴﻪ ﺑﺎﻷﺭﺑﻊ ﺑﺎﻛﻮﺍﺕ ﻭﺍﻟﺘﻦ ﺑﺎﻟﺨﻤﺲ ﺣﻜﺎﻙ ﻭﺍﻟﺪﻭﺍﺀ ﺑﺤّﺔ ؟
ﻣﻨﻮ ﺍﻟﻠﻪ ﺧﻠَّﻰ ﺳﻌﺮ ﺍﻟﺒﺎﻧﺪﻭﻝ ﻳﺪﻳﺮ ﺍﻟﺼﺪﺍﻉ ؟
ﻣﻨﻮ ﺍﻟﻠﻲ ﺧﻠَّﻰ ﺍﻟﻤﺴﺘﺸﻔﻴﺎﺕ ﺯﻱ ﺍﻟﻮﺭﺵ - ﻣﻨﻚ ﺍﻟﻤﻌﺪﺍﺕ ﻭﻣﻨﻬﻢ ﺍﻟﻴﺪ ﺍﻟﻌﺎﻣﻠﺔ - ؟
ﻣﻨﻮ ﺍﻟﻠﻲ ﺧﻠَّﻰ ﺷﻮﺍﺭﻋﻨﺎ ﻛﻨﺎﻳﺲ ﻭﺣﺎﻝ ﺍﻟﻌﺒﺎﺩ ﺣﺎﻳﺲ ﻭﻛﺎﻥ ﺻﺒّﺢ ﺍﻟﺼﺒﺢ ﻳﻠﺤﻘﻪ ﺍﻟﻠﻴﻞ ﺑﺎﻳﺲ
ﺍﻟﻠﻲ ﺩﺍﺭ ﻫﺪﺍ ﻛﻠّﻪ ﻣﻨﻮ يا ستة مليون ؟؟
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -